ഉടലുകള്‍ക്കുള്ളില്‍ സുരക്ഷിതര്‍ എത്ര?

ശരീരത്തെ വരയ്ക്കുക

അത്ര ലളിതമല്ല

ഉടലിന്‍റെ അതിര്‍ത്തികള്‍

ഒരു രേഖയിലും ഒതുങ്ങില്ല.

കാക്കയുടെതോ

കുരുവിയുടെതോ

ചലനത്താല്‍ വരയ്ക്കാം

പറന്നു പോകാതെ.

കുതിരയുടെത്

കുതിപ്പില്‍

ആമയുടേത്

ഏറ്റവും അടക്കത്തില്‍.

പാമ്പുകളെ

ഇഴച്ചിലില്‍

കുഴമറിയാതെ.

മനുഷ്യനെ വരയ്ക്കുമ്പോള്‍

വര വഴങ്ങുകയേ ഇല്ല.

ഒരതിര്‍ത്തിയിലും

കൈകള്‍ക്ക്

അതിന്‍റെ കരുത്തോ

കരുത്തില്ലായ്മയോ

കൊടുക്കാനാവില്ല.

കഴുത്തറ്റത്തു നിന്നും

തല

തെറിച്ചു പോകാതെ

വരച്ചു വെയ്ക്കുക

ശ്രമകരം.

കണ്ണ് മൂക്ക് ചെവി ചുണ്ട്

ഒരു ഇന്ദ്രിയത്തിലും

അതാതിന്‍റെ കര്‍മങ്ങള്‍

അടങ്ങി നില്‍ക്കില്ല.

നെഞ്ചിനെ

അരക്കെട്ടിനെ

ഒരു കട്ടി രേഖയിലും

തളച്ചിടുക അസാധ്യം.

ഈ വെള്ളപ്രതലം

എടുക്കുക.

അതിലുണ്ട്

പലതായ് പെരുകിയ

ഒരുടലിന്‍റെ ചിത്രം.